اطلع لول باكا رحمه الله قالها أيام أحداث السنغال لأهل الشيخ ابراهيم انياس

اطلع لول باكا رحمه الله قالها أيام أحداث السنغال لأهل الشيخ ابراهيم انياس 1989م
يحكيها الاديب الدكتور احمد ولد البو

ارْبَطَعشرْقرن اتْخطاتْ =هجريَّ واثمنْ سنواتْ
واثمنتْ اشهرْ تمّتْ وامشاتْ = هاكْ إليال من رمضانْ
يوم اثلاثَ فيهْ ءُ سنتات =شيّاتْ امْبينْ أهْلْ الحيوانْ
وأهلْ لحريثَ خلفات = من خلافاتْ أهل انْغِرانْ
فالزرْ الگبلِ سرغلاتْ =أنغرْ ، ءُ فالدون فُلانْ
ءُ سنتَ تاريخْ إلتهاباتْ =في السنغانْ أمالْ البظانْ
أهل مورتان ألّ جات = فايديهَ ضنكْ المُورتانْ
وانهانتْ فى السنغانْ ءُراتْْ =العريَه واجُّوعْ ءُتمتانْ
الديگه ماتُ دُزيناتْ =غليانْ الظهرْ فى اطليانْ
ءُ ترْكتْ لعلياتْ ءُشوّاتْ = فالفُراتْ إنتَكْلُ صبيانْ
ءُ ش ثانِ مايدخلْ لفّامْ = أكبرْ من گدُّ ماتنعام
ابحورُ شديدَ واكلامْ = ماتحصيه إعيّ لذهانْ
العلْمَ والشرفَ تنسامْ =بالشر ءُ تتواسَ دكان
وأوْرَگّ ُلشياخ ،ءُ لسلامْ =أُرگّگْ ، وأُرگّگْ لنسان
ذاكْ اليمْ اذهبْ فيهْ أرايْ = ءُ عادتْ فيهْ البظانْ أسْبايْ
ءُ لاحاذَ منهم حدْ أرايْ =حگْ ءُ لاعينكْ فالسولانْ
إشمَا مرّ تجبرْكمّايْ =أثرُو باشروطُ للدخانْ
ءُسادتْ سيبَ وافتيمشايْ= ذيك السيبَ سادْالطغيان
نعوذُ باللهْ ءُ لاعادْ = واگفْ حدْ افوجهْ الفسادْ
ءُ لاعادتْ فيه الناسْ أگدادْْ = ءُ لاجبرتْ فيه الناسْ أعوانْ
ءُ يوم أُورَ يوم أباش إنزادْ = ءُ يوم أورَ يومْ أباشْ امتانْ
وارتشگُ لگلوبْ ْءُ لبلاد= إمترگُ وامتانُ لحزانْ
ءُلاتَ عارفْ فيهْ أركاجْ = وجه أرايْ ءُلاهُ محتاجْ
حدْ إسولْ عَمْ التجلاجْ = وجْهِ ماهُ شوركْ وامتانْ
الحالْ اولادْ آدمْ تتْباجْ= منْ هكْ امنْ هكْ ءُ تزّانْ
گامُ هِلْ مَدينَ بالحاجْ =عبدَ اللهِ گامُ فَوَانْ
ماهُ كلْ أرگاجْ إگومْ = عشْرايتْ لحميرْ امنْ الصّومْ
اعگيّابْ ابريلْ ألاّيومْ = شِ فيهْ ءُعشرينْ الحمّانْ
إِريفِ لمتينْ ألَيْطُومْ = مَيَ وابريلْ ءُ رمضانْ
إفكولخْ فالصيفْ ءُلاخافْ =حدْ أُرَ ذاكْ، ءُ ذاكْ انشافْ
جمعُ تلگّاطْ امنْ أصنافْ =الناسْ ءُ گامْ إلْدارگْ بانْ
ألا حكما مشاوْ أشوافْ = إكْراوْ الشرطَه والكِرانْ
والناس إلْتگطتْ منْ لجرافْ = وامن الغابه وامن إدرگانْ
واتْكرُّعندْ الحاجْ ألافْ =امن الناسءُمكثُ فأمانْ
والْگاوْ إعليهمْ فمْ أطراف = لمان ءُ لحسان وليمانْ
وابلغنِ عنهم شِ امنْ اتلافْ = الحيوانْ ءُ شِ من لحسانْ
ءُ من بذل النفسءُ لعترافْ =أكثرمن شِ موزّنْ كانْ
هاذ شِ ماتنساهْ الناسْ =لأهلْ الشيخْ ابراهيمْ انياسْ
واثرْ الخيرْ إنسّ فالْباسْ =ءُ خيرْ البظانْ إدورْ إبانْ
لعادُ فيهم خيرْ انكاسْ = اظلمتوهمْ بالخيرْ أيْتانْ
فصلهمْ فالخيرْ الدوْلَ =عادتْ للسيبَ تيوتّانْ
فيهمْ وامْتسحُ يَلُولَ = گاعْ انتومَ ما يطلعْ شانْ
للبظان ءُ ها ذَ واگفْ = كذبُ رجالْ المواقف
بركُ واصمدتْ انتَ واگفْ = يالحاج اعليهم فمْ اگرانْ
التّاويگكْ واگفْ حالفْ =عنكْ ماتستراحْ أيمانْ
ذَ من كبرْ الخيمْ امْخالفْ = هاذَ ماهُ وقت التوگانْ
اخْوالفْ كحلَ تتلاگفْ =قاثْرْ الفظّ تحتْ أرَدانْ
البارودْ ارْفدْ بوكْ ءُ حُوزْ =واعْملْ هاكْ أطفگْ خُوكْ اتْفوزْ
ولّ زايزْ ولّ مزيوزْ = ولِّ حارنْ ولِّ جفلانْ
ولِّ ولِّ يوسرْ منزوزْ = منْ لُمورْ إلْماهِ بهتانْ
واللهِ مابهتانْ إلااعْـ = ـملْنَ فيدينَ عنك گاعْ
هاذَ فرظْ اعليكْ ارتفاعْ = الفروعْ ألاّ منْ لركانْ
الشيخْ ابراهيمْ الشجاعْ =بوكْ ءُ جدكْ بوهْ السلطانْ
وانتَ كيفتهم ماترتاعْ = من لعْدُ تغلْبْ الشيطانْ
واموحدْ فالحكْ ءُ ركّاعْ = للواحدْ عابدْ للسبحانْ
والدينْ اخترتُ فارتجاعْ = الغربَه فاخيرُ الزمانِْ
“طوبى للغرباءِ ” ذاعْ =حديثْ إمامْ أهل القرءانْ
اربطعشرْ قرن اتْخطاتْ =هجريّ واثمنْ سنواتْ